Bi minasebatê hameyîşê ser a newa, şeş-hewt xortê dewi şînê yew keye di kom bînê, kay viraştênê (organîze kerdênê). Mîyanê xortan ra yew bînê veyvek, yew zî bînê zama. Lajik o ki bînê veyvek, xortan cilê cenîyan piradaynê heze veyvek weş xemilnaynê. Temezî yê kesk sûr û zerdî serdê veyvek ro pêştênê. Lajik o ki bînê zama, xortan bi cilan ê cûr bi cûr weş xemilnaynê. Xortan bi peşmo sipî, zamay rê eyş û simbêlî viraştênê. Dim ra yew kefî seredê zamay ro piştênê û yew şewqa zî cor di kefî ser o serî ser naynê. Qiflê xortan ki hedireya xwi temam kerd, dest bide kerdênê şînê mîyanê dew di, mehela bi mehela, keye bi keye Damdami gêraynê. Qiflê xortan ki bişînê berdê kam keyî ver, ver ê verikan daynê ber ro. Ehlê keyî ra yewê hameynê berî ver di hetê zerî ra veyndaynê, vatê:

• Şima kamî?

  Qiflê xortan ra yewê, vatênê:

• Serê serri, binê serri, Pîrê… Kalo… ma hamê Damdami

  Enê vatişanê xortan ra pey, wayîrî keyî bi kêfweşî xortan re ber akerdênê. Bi îzet, bi îkram, bi kêfweşî xortî keremê (dawetê) mîyanê keyî kerdênê. Xortî senî ki ber ro dekwtênê mîyanê kêyî, ver ê ki şorê mîyanê odî, mîyanê heyat a banî di dest bidekerdênê dekewtênê têdest yew midet govendi gêrotênê. Xortî bi girotişê govendi dekewtenê mîyanê odî. Xortî mîyanê odî di zî yew midet ehlê keyî rê govendi gêrotênê. Xortan ra yewê mîyanê rêz a govend ra vejîyaynê dadaynê bi destê veyveki, waştênê ki veyvek zamay dest ra biremno. Eno nabên di zama zî semedo ki şar veyveka jê nêremno, nobol dopolê xwi di gopal a xwi têşanaynê, veyvek a xwi hemet kerdênê. Zama nêverdaynê xort veyvek a jê bero. Yew midet mîyanê odî di kay û şerê xortan bênabin domîyaynê. Eno nabên di ehlê malbat bi yew kêf û eşq temaşê kayê xortan kerdênê. Ehlê malbat bi kayê xortan zaf kêfweş û şa bînê. Kêfan ra her fertê malbati cayê di hîk hîk hiwaynê, hiwayîş ra xwi ra vîyartênê. Xortan ki peynî bi kaykerdiş ard, xortan ra yewê, vatênê:

• Serê serri binê serri, Pîrê… Kalo… semedê serda newa, ma wazenê geşta serri.

  Yan zî bi kirdasî vatênê:

• Serê salê, binê malê, Kalo…Pîrê…, em dixwazin geşta salê.

  Enê vatişan ra bey, kebanîya keyî bi kêfweşî ´era hêzdaynê wariştênê pay şînê heyat a zerî ra qismêk êmîş (bastêx, helawî, kesme, sincoxî) û zexîra (bilxwil, şorba sûr) girotê ardê daynê xortan. Xortan ki geşta xwi girot, xatir ehlê malbat ra waştênê, keye re vejîyaynê şînê mîyanê dew di yewna keye.

  Mîyanê dew di eno gêrayîşê xortan heyanî erêyê şewi domîyaynê. Xortan ki mîyanê mehela di gêrayîşê xwi temam kerd, heme têdir şînê yew keye. Xortan çîyo ki mîyanê mehela di mîyanê keyan ra kom kerd bi, hezêpê yewînî ro pari kerdênê. Her xort par a xwi çîyê gêrotênê. Xortan çîyo ki mehelan di mîyanê keyan ra kom kerd bi, xeybe yew qisim girotê berdê daynê dewij o ki debar a jê rind nîbî. Dim ra xortî yew yew vilabînê şînê keyandê xwi.