Rojêk mesûlê qerekolî veynda esker ê nobedarî dano û bi yew fengê do berz, vano:

• Enê celbanê eskerîya beri bidi filan eskeran, wa berê dewon ro vila bikê!

  Esker o nobedar başnanê niggan dê xwi dano pêro, vano:

• Serî ser mesûlê mi!

  Dim ra bi lez ode (wede) ra vejîyeno.

  Eskero nobedar, ca di vatişê sereskerî (qumitanê) cendirmê tirk û kurdî resneno, bi yew vengdo berz vano:

• Enbazênê! Seresker vat, wa enê celbanê eskerîya berê dewan ro vila bikê.

   

  Rojo bîn, şefeqê coser ra tirk û kurd qereqol ra vejîyenê, bi peyatey raşt vera xwi danê rayîdê dewan. Epey rayîdşîyayîş ra pey, tirk hewnîyeno ki betilîya wo. Tirk xwi pîze di fikirîyeno, ki yew deki (oyun) bi enbazdê xwi yê kurdî ro virazo. Tirk xwi pîze di vajîyeno, vano ez go kurdî ra vaja, bê ma yewbînî wegîyê (wegîrê). Ki mi ti wegrotî mîyane dê mi sero ti yew deyri vanê. Ki deyra to qedîyay, naro ti mi wegênê ez mîyane dê to sero yew deyri vana. Tirk xwi bi xwi vano senî hawa bibo, kurd weş tirkî nêzano. Deyra (lawikî, kilam) ki kurd vajo do di-hîrê qalî bê. Ki nobi (dori) hamey bi mi, ez go yew deyra dergi vaja û xwi rê mirdî kurdî wenişa. Fikirîyayîşê ena dek ra pey, tirk, kurdi ra vano:

• Enbaz!

  Kurd, vano:

• Belê, kerem biki.

  Tirk, vano:

• Bê ma yewbînî wegî yê.

  Kurd, vano:

• Baş o. Lakim senî hawa?  Senî ma go bizanibê, ki ma çiqas yewbînî wegroto?

  Tirk, vano:

• Ki mi ti wegrotî, mîyane dê mi sero ti yew deyri vaji. Ki deyra to qedîyay, ti naro mi wegênê ez mîyane dê to sero yew deyri vana.

   

  Kurd, verê tikêkê fikirîyeno. Dim ra xwi pîze di vano, xule ez go verê tirkî wegîya. Deyra tirkî kirra. Go sevajo? Go vajo yaylalar, yaylalar, ponc deqey ra pey, deyra tirkî qedîyena. Ki nobi amey mi, ez go dest bi deyra Hesenê Mûsoy bika. Kêmasey yew seet romena. Ez go mirdî tirkî wenişa.

  Kurd, tirkî ra vano:

• Enbaz!

  Tirk, vano:

• Belê, kerem biki.

   Kurd, vano:

• Verê ez to wegêna. Ki deyra to qedîyay, naro ti mi wegênê.

  Tirk, vano:

• Hayhay, başo, beno.

  Kurd, tirkî wegêno.

   

  Tirk dest bi deyra xwi keno, vano:

• Yaylalar yaylalar... ay akşamdan açta gel, dilo dilo yaylalar...

  Welhasil çend deqey ra pey, deyra tirkî qedîyena.

   

  Noba wegrotişî yena bi tirkî. Naro tirk, kurdî wegêno.

  Kurd senî ki mîyane dê tirkî wenişeno, ca di destê xwi beno goş dê xwi ver, dest bi deyra Hesenê Mûsoy keno, vano:

• Lo lo lo... lo lo lo...

  Deyra Hesenê Mûsoy derga, nêqedîyena. Nabên ra epey wext vîreno. Tirk hewnîyeno ki deyri nêqedîyena.

  Tirk, kurdî ra vano:

• Enbaz!

  Kurd, vano:

• Kerem biki, vaji.

  Tirk, vano:

• Deyra to nêqedîyay?

  Kurd, vano:

• Nê, nêqedîyaya. Ena lolo ya, hama lêlêya deyri menda.

   

  Tirk ca di kurdî xwi mîyanî serra roneno, vano:

• Nê enbaz, nê. Ne ez to wegêna, ne ti mi wegî. Vegrotiş qedîya.

  Kurd, vano:

• Ti zanê. Kêfê to yo.

ŞOREŞ Ê ŞEWQA

Beyankerdişê Cûmhurriyet ê Tirkiya ra pey, serekê Cûmhûrriyet ê Tirkiya Mistafa Kemal 1935 di yew qanûn vejeno. Namê enê qanûnî, kanûnê şewqa yo. Ferman Tirkiya ro vila beno. Kefî xwi sere ro piştiş û kilaw û fes xwi serî sernayîş qedexe wo. Gerê heme kes mejbûr şewqa xwi serî serno! Kamo ki îhtiramê qanûnî nêko, ceza beno!

Welhasil qanûnê Mistafa Kemalî heme mentîqan ê Tirkiya û yê Kurdistanî ro vila beno.

Rojê yew dewa Kurdistanî di, yew dewij îhtiramê enê qanûnî nêkeno. Muxtarê dew sekeno nêkeno, nêşêno şewqa seredê enê dewijî ser no.

Muxtar veynda enê dewijî dano vano:

• Bewnî, dewijê mi. Kam şewqa xwi serî ser nêno, ceza beno! Ceza enê zî zafa. Ki ti şewqa xwi serî sernênê, ez mecbûra şora qereqol di seresker ra vaja!

  Dewij, muxtarî ra vano:

• Ez şewqa xwi serî sernêna. ’Edetê bav û kalikan dê ma, kefî xwi sere ro piştişo.  Bav û kalikanê ma şewqî xwi serî ser nênaya. Ez zî şewqa xwi serî ser nênana. Ti şonê kamî ra vanê, şo vaji.

   

  Welhasil muxtar, mecal (îmkan) dewijî di nêveyneno. Nêşêno dewijî qene (ikna) biko. Muxtar, şono gerê dewijî qereqol di keno. Qereqol ra di zeftî yenê dew.  Zeftî enê dewijî gênê benê qereqol. Sereskerê qereqolî dano dewijî ro. Kefî seredê dewîjî ra gêno bi zor şewqa seredê dewijî ser nano. Dewij senî ki reseno dew da xwi, şewqa xwi serî serra roneno, rana kefî sere dê xwi ro pêşeno. Muxtar hewna şono gerê dewijî qereqol di keno. Zeftî rana yenê dew. Zeftî hewna dewijî gênê benê qereqol.

  Seresker ê qereqolî bi hêrs dewijî ra vano:

• Qey ti şewqa xwi serî ser nênanê?

  Dewij, vano:

• ’Edetê ma nîyo. ’Edetê ma kefî xwi sere ro piştişo. Bav û kalikanê ma kefî xwi sere ro pişta. Ezî  kefî xwi sere ro pêşena.

   

  Seresker rana kefî seredê dewijî serra gêno bi zor şewqa sere dê dewijî ser nano. Dewij senî ki mîyanê qereqol ra vejîyeno, ca di şewqa sere dê xwi serra roneno, verê kefî xwi sere ro pêşeno, dim ra zî cor di kefî sero şewqa seredê xwi ser nano. Seresker zî pencera ro temaşê dewijî keno. Seresker veynda yew eskerî dano, eskerî ra vano şo ay dewijî bîyar mi het. Esker şono pol ê dewijî tepêşeno gên beno sereskerî het.

   

  Seresker, rana dewijî rê şîretan keno, vano:

• Lajêm! Mi enkay to ra nêva ti gerê kefî xwi sere ro nêpêşê, tenê şewqa seredê xwi ser nê?

  Dewij, sereskerî ra vano:

• Ma ti nê veynenê, şewqa ha seredê mi sero ya.

  Seresker vano:

• Temam, ez veynena, to ha şewqa sere dê xwi ser naya. Mi fam kerd. Ti çirê bindê şewqa di kefî xwi sere ro pişta (pede kerda)?

  Dewij xwi fek di niçeno û  bi kurdî vano:

• Eno herr, lajê herî. Ê ma binda, ê  yîni sero ya, rana zî qebûl nêkenê.