DÎROK Û BAVIKÊ DEWA HIMBÊLÎ 6.bölüm

Dew di wesar

Serra ki zimistan zaf xidar nêbo aşma adari hewto ewilî wesar dest bide kerdênê. Serra ki zimistan xidarbo wesar erê dest bidekerdênê. Yew di hewte yê ´ewilî, yê wesarî xapînokênî. Yew serran wexta ki wesar rew dest bide kerdê, hewto ´ewilî hindi ki germ bînê dewijê dew terş ûdewarê xwi semedê çerenayîşî berdê yaban û dehlan. Ray rayan zî hewte wo didin di eyan bedilîyaynê bînê şilî varit, şilope, tîpî serd û seqemî rey di çogê ki vewri kewtênê ´erdî ser. Yew di heme ca vewr ra sîpî bînê. Her serra ki wesar rew dest bidekerdê rew bînê germ, şarê dewi semedê hayîgdarey û şîyarey bahsê Gîskokanê dapîrok kerdênê.

Gîskokê dapîra extîyari

Gor vatişan, vanê yew wext di aşma adar hewto evil eyan zaf bîyo germ. Eyan hindi ki germ bîyo velg û vaş xwi akerdo. Yew dapîra extîyari tûşkanê (gîskî) xwi semedê çerenayîşî berdê yaban. Yew di eyan bedilîya wo. Dest bide bîyo vewri bi şilope varaya, bîyo serd û seqem. Serdan ver ra tûşkê dapîri merdê. Eno hedîse ra pey, her serri despêka aşma adar di semedo ki dewijî bi germê aşma adar yo hewto ´weilî, nêxapîyê, hayîgdarê aşma adar bê, bahsê gîskokanê dapîr´a extîyari kenê.

Hameyîşê wesarî reydi dinya bedilîyena. Wesar herayey vatiş´o. Bi taybet Kurdistan di wesar yewna hawa wo. Xweza (tabîat) bi gulan, sosinan û vilikanê reng bi rengan xemilîyena. Tewir tewir boy dorman ro vila bena. Wesaran rengê xweza (tabîat) zî bedilîyeno, beno renk bi reng. Mîyanê hêgayanê beyaran û mergan di reng bi reng tewir bi tewir gul û villikî abenê. Xweza bi zaf rengan xemilîyena. Mîyanê hêgayanê beyaran û mergozan di vilikî yewinî vero heze ki weşî û rêndeya xwi di dekwîyê têqerez, yew yewrî ra rindêr, yewinî vero qam danê.  Vilikî heze ki heskerdiş û rindeya xwi yewbînê rê vajê. Kê vatêqay vilikî yewinî reyda qalî (qisey) kenê û teriqnenê. Vilikê tawsek, bi pelandê xwi yê sipîyan, heze mexmela sipî mîyanê hêgayanê beyaran xemilnaynê. Hela vilêkê sûrî, heze keynekanê ´ezeban, bi bejna xwi ya barî, verbi asmên qam daybî. To vatê qay veyvekê esparkerdey, temezîyê sûri û keskî vilikan sere ro piştey, mîyanê hêgayanê beyaran û bendan verdi, yew yewerî vero vinderte, çalim daynê bi yewinî. Vilikan sero bînê vigi vinga mêş û molan. Miş û molan tamê germê wesarî girotênê. Mêsanê hingimênî mîyanê hêgayanê beyaran û mergozan di bi lez û bez tewir tewir vilikanê vaşî û daranê fîkîyan ra niştênê û wariştênê. Heze ki ´ecelê mêsanê hingimênan bibo, yew vilik ra şînê bi vilika bîn ra nişenê. Mêsê hingimînî heze ki vajê wa vilikî mara eciz nêbê û rindêya vilikan cênêkuwî yo, hêdî hêdî, bi dîqet, bi vilikana niştê û wariştênê.

Yew yew mîçikan zî, heze ki ena xebata mêsanê hingimênan tahmûl nêkê, kerdênê vîçi vîçi, wendênê. Mîçîkan gilîçikanê daran sero vengêdo zelal û tewir tewir harmonî vetênê. Yew yew mîçikan semedo ki hesûdîya xwi bêlû nêkê, heze tîrmarî cor di xwi gilîçikanê daran serra verdaynê, şînê mîyanê hêgayanê beyaran û mergozan di tewir tewir vilikana niştênê. Hêgayanê beyaran mîyan di yew yew mîçikî hewa di vinderte cor di vilikanê veyvekênan sero, perê xwi lez û bez têşanaynê. Mîçikan bi ostatey, heze xorto ki lewi bi alişka keyna ´ezab ra no, yew yew nukulî bi dîqet daynê bi vilikanê sûran ro.

Mîyanê hêgayan, bostanan û bexçan ra tewir tewir boya gulan, vilikan û vaşo teze, dorman ro vila bînê.

Xeynê nêweşan û extîyaran çew mîyanê dew di nêmendênê. Heme dewijî mîyanê rezan, bostanan, hêgayan û axpînan di yew xebatêda lez û bez di bî.

Mîyanê axpînan û mergozan di temaşekerdişê çerayîşê berxan, bizkan û golikan bi serê xwi yew kêfweşî bî. Bizêkî, berxî û golikî ki mergozan di mîrdî vaşo teze werd, mird bî, dest bide kerdênê yewinî reyda kay kerdênê, çindikî vistênê, xwi qelo qoçî kerdênê yewbînan fetilnanynê.

Wesar vetiş heme tengasey peydi mendiş vatişbi. Tengaseya zimistanî cay xwi wesarê xêr û bêrî rê verdaynê. Dar û ber dest bidebibi terin bibi. Çayîr mîyanê mergozan di kesk û şîn kerdênê.

Kebanîyê dewi banan, orxmanan sero, verojkan di, tewir tewir karî kerdênê. Qorê kebînîyê dewi zî verojkan di hemeybî têheti, rişta destibî, lez û bez mû ya zî peşim rêştênê. Kebanîyan veroşkan di hetê ra rişta mû, ya zî peşmî riştênê, hetê ra zî yewinî reyda kewtbî sohbetan, naşt daşt ra hedîsê ki zimistanî mîyanê dew di qewimîyaybî bahs kerdênê. Qorê kebanî zî fekê beranê banan, hewşan û orxmanan ver di hetê ra karê xwi kerdênê, hetê ra zî derd û kulanê xwi rê hêdîka lornaynê. Yew rayan vengê lornayîşê kebanîyan hindi ki xwirîn û şewatin bi, ca di zera kesî xira bînê. Bermîyê kesî hameynê.

Her rojo wesaro germin di vengê ´ema Hewik, maya Welîdê Usmanî ’ema Besik û Xeja yayîka marda mi orxmandê xwi sero him karê keyandê xwi kerdênê, him zî derd û kulanê xwi rê lornaynê. Vengê bermîyê enê cenîyanê extîyaran hindi ki şewatin û zerî ra hameynê mimkun nêbi ki kes dayax biko. Xeji hertim sekuda bandê xwi sero roniştebî, derzîna lak pakerde destibî, hetê ra pêşmala xwi pîne kerdênê, hetê ra zî xorîn xorîn lajê xwi ´Emoy rê lornaynê. Xeji yayîka marda mi Fatma bî. Banê Xeja kirdasi hema kêleka banê ´ema ma Hewik ra zeliqnyabe. Xeji dewa Şilbetan ra bî. Him ´ema Besik, him yayîka Xeji û him zî Hewik ´ema pêrdê ma Hecî yê Sejik, heme hîrê cenîyanê extîyaran semedê birayan û lajanê xwi lornaynê, bermaynê.

Welî lajê ´ema Besik ciwaney di jîyana xwi vinî kerdbî. Wexta ki Welî merdbi kulfetî jê wirdî bî. Helîma cenîya Welî mîyanê zaf zahmetan di, di lajî û hîrê keyney weye kerdî, pîl kerdî. ´Emo lajê Xeji zî nêweşîya qanserî ra jîyana xwi vinî kerdbî. Hewika ´ema pêrdê ma Hecî yê Sejik zî wirdî biray xwi serehewonayîşê şêx Seîd di şehîd daybî.

´Emo lajê Xeji, ver ê Fata keyna Ehmê reyda zewjiyabi. ´Emo û Fata keyna Ehmê ra hîrê lajî û yew keyna bîbî. Namê laj û keynanê ´Emoy û Fatma: ”Zilvî, Mihemed, Xizali û Ehmed”. ’Emo çerçîtê ya dewi kerdênê. ´Emo semedê çerçîtey şînê dewanê dormî zî. ´Emo rojê semedê çerçîtey şibi dewa Şilbetan. `Emoy, dewa Şilbetan di Cemîla veynaybî. Zera ´Emoy dekewt bî Cemîla. Cemîla kesêda viyaybî. Senî hawa bîyo mêrdê Cemîla merdbi. Yew mitet ra pey, ’Emo bi Cemîla rey di zewjîya. Eno zewajî ra pey, ´Emo cenîya xwi ya ewilî Fatma keyna Ehmê Çiloy verraday. Eno veradayîş ra pey ’Emo, kulftî Fatma ra girotbî. Fatma kêdê xwi ra teber kerdbî. Yew keyna Fatma şenik bî. Namê ja Xizali bî. Yew midet ra pey, Xezala keyna Fatma merd. ´Emo û Cemîla ra zî yew laj bi. Namê lajê ´Emoy û Cemîla Heyder bi. ´Emoy namê pêrdê xwi lajdê xwi ra nabi. Gedê ’Emoy û Fatma wexta ki biney bî gird, şiy Îzmîr. Fati him veradayîşê ’Emoy, him zî tahmûlê şîyayîşê lajandê xwi nêkerdbi. Fatma yew midet ra pey bî xînt. Hertim mîyanê dewi, kuçan û mehelan di bînê qîri qîra Fatma, him bermaynê, him zî zawtî daynê ’Emoy û Cemîla ro.

Maya mi çiqas ki Fatma dînê derê zaf verkewtênê, vatê ´Emo û Fatma zaf yewbînan ra heskerdbi. ´Emo xapîya, Fatma verra day. ’Emo him verdayîşê Fatma û him zî şîyayîşê lajanê xwi yê bi Îzmîrî tahmûl nêkerdbi. Yew midet ra pey, qahran ra yew rêşi qirika ´Emo´y ro vejiyaybî. Bi ena rêşi, ’Emo qanser bibi. ’Emo semedo ki nêweşî ya xwi darû biko şibi şaristanê Ankara. ´Emo hewna pey di nîyamebi. Çewerî nêzana, sebibi ’Emoy. Aw wexto û eno wexto, xeber ’Emoy ra çinîya. ’Emo merdewo, ya ganî yo, çew pê nêzano.

Wesaran xortê dewi banan, orxman û sekûwiyan ser o kabey û hakî kay kerdênê. Nika kaykerdişê kaban û hakan zaf dewanê Kurdistanî di nêmendo. Belkî tay dewanê Kurdistanî di kaykerdişê hakan û kaban hema esto. Wextê xorteya mi di dewa ma di kaykerdişê kaban û hakan zaf kemî bibi, hata kêşênê vajê çewerî hêdîna kay nêkerdênê.

Kayê ki xortan û gedanê dewi axpînan di û silgoyan ser o kay kaykerdênê:

”Limitiş, topa xêzi, topa çiwî, hîrê gami, gama lengorî, keley, çoxarê, kerra quwetî, kipînos, xîçikî û xwi yewinî serra çengkerdiş, anasar kay kaykerdênê”.

Desbidekerdişê wesarî di dar û ber senî ki terin bînê, verê ki pel ako, dewijî mîyanê rezandê xwi di lez û bez mêwanê rezan birînaynê. Her rezî mîyan di 4-5 paley xebitîyaynê. Cenî û keynê dewijan zî mîyanê rezan di palan dima tûrê mêwan weçîynaynê. Dewijan mîyanê yew hewtî di birînayîşê mêwanê rezan peynî bide ardênê.

Dewijê ki bîrînayîşê rezanê xwi rew qedênaybî, dest bidekerdbi haleta darêni vistbî pey gayan mîyanê mêwanê rezî citti kerdênê. Nobahdî haletê citi yê asnênî ki vistê pey estoran vejîyaybî. Verê ki mêwê rezan pelanê xwi akê, dewijan birînayîş û citikerdişê mîyanê mêwanê rezan qedênaynê. Citkerdişê mîyanê mêwanê rezan ra pey, dewijan dest bidekerdê bi sarbûnan mêwê rezan piştênê.

Wesaran ki velg û vaş kesk bi, dewijê ki terş û dewarê jîn zêdebî terş û dewarê xwi girotê berdênê waran. Cay waranê dewijan xeybe birekan û koho di bi. Dewijî hetanî peynîya aşma gulani waran di mendênê. Ver bi aşma gulani ki germ dest bidekerdênê, awka çalan û deran kemî bînê, dewijan dest bide kerdênê waran serra hameynê dewi. Dewijê ki gomê jîni bî, bi terş û dewarandê xwi ya heyanî peynîya aşma omnanî ya peyêni goman di mendênê. Gomê dewijan xeybe birekan û koho di bî.

Dest bide kerdişê aşma Nîsani di dinya hêdîna germ bena. Mîyanê terş û dewarî germ beno. Kal û pîrî dewi sekûwîyan ser o verojkan di xwi danê tîna rojî ver, serdê zimistanî xwi serra fînenê. Kal û pîrî weşîya germêya tîna rojanê wesarî gênê.

German ra dar û ber pel aken o. Tewir tewir vaş vejîyeno. Mergan û hêgayanê beyaran di çayîr qam dano. Heme ca bi velg û vaş xemilîyeno. Terş û dewar veyşaney û tengaseya zimisatnî ra xelisîyeno, dekweno mîyanê xenîmetêya wesarî. Wextono ki terş û dewar dekuweno wesar, mirdî çayîr weno, bi mirdbîayîşê çayîr ra pirên bedilneno. Mûyê terş û dewarî yo ki zimistanî qilêr ra qertik girêdabi, cay xwi mûdê newî rê verdaynê. Weznê terş û dewarî bedîlîyaynê, bînê weş. Terş û dewaro ki zimistanî veyşanê ra zayîf kewtbi, ca di bînê qelew. Terş û dewar bi mirdbîyayîşê çayîrê mîyanê axpînanê beyaran, hewşan û silgoyan sero, ya zî mergozan di kerdênê ori ori û lotîzîkî daynê xwi ro.

Wesaran serê sibay senî ki şefeq daynê piro, tîrêjê rojî dest bidekerdênê pey koyan ra temam hasenê nîyasaynê, mîçikî zî heze ki dewijanê dewi hewn ra weraznê, daranê tiwêran û perçînanê hewşan yê keyan ser o kerdênê vîçivîçi. Vengê viçivîça mîçikan, hechecikan û yê kebanîyanê dewijan têqelibîyaynê. Tewir tewir vengî hameynê. Yew yew vengê lornayîşê kebanîyan hindi ki xorîn û şewatinbi, ca di zera kesî xira bînê, bermîyê kesî hameynê.

Qorê dewijî zî şîbî bostanan mîyan, mîyanê bostanan citti kerdênê. Citkerdişê bostanan ra pey dewijan dest bide kerdênê semedê sitlê taro teze mişarî viraştênê. Wesaran kebanî û keynê dewijan, serê sibay rew karê mîyanê keyan kerdê, qedênaynê. Dim ra kebanî û keyney keyan ra vejiyaynê, semedê çînayîşê taro yabanî qifle bi qifle şînê yaban.

Taro yabanî: ”Xazîg, Kenger, Tirşongi, Gêlêzani, Sîrim, Tusiki, Kuyeki, Şingî, lexendûr, toliki, gizêrî, axpandir, qapîrikî û pûne (pirpar aşma gulandi mîyanê bostanan di vejîyaynê)”.

Cenî û keynê dewijan bi lez û bez mîyanê leman û hêgayan ra taro yabanî çînaynê. Hetanî ver bi êrî xebata çînayîşê tarê yabanî domyaynê. Dim ra cenî û keyney yaban ra pey di agêraynê hameynê keyandê xwi. Cenî û keynê dewijan ki hamey keyandê xwi verê biney werdiş werdênê, ki veyşanêya xwi vîyarnay, dest bide kenê taro yabanî yo ki yaban ra çînabi tewrandê xwi ra vejenê, kenê selikan û sizgêçan semedê şitişî gênê benê bîran û ênîyan ser o pank şitênê. Cenîyan û keynan ki tar o yabanî bîran û ênîyan ser o pank şit, pey di agêrenê yenê keye. Cenî û keyney semedê şamîya malbati taro yabanî kenê tenceran û quşxanan gênê kuçlananê adirî sernaynê, adir kerdênê girênaynê. Wesaran taro yabanî zaf weşo. Hela hela werdişê xazîg, kuyeki û gêlizan rê vatiş çinyo.

Peynîya aşma nîsan di cenî û keynê dewijan kilîm û palasê ki gend û gemara zimistanî ra qilêr bîbî, berdênê deran û ênîyan ser o bi lez û bez şitênê. Cenî û keynan deran û ênîyan sero him kilîmî û palasî şitênê, him zî germ germ yewinî reyda naşt daşt ra teriqnaynê. Xeybe teraqa keynan heskerdoxan ser o bî. Keynan wexta ki deran û bîran sero palasî û kilîmî şitinê, ki çimê jîn bi lajikan yê xortênî ra bikewtênê, bindê çiman ra yewbînan ra hewnîyaynê, dim ra şerman ra rîyê xwi yewbînan ra tadaynê.

Destbide kerdişê aşma Nîsan di darê vamêrî, alimçey, mişmişî, kîraz û încazan reng bi reng villikan akenê. Boya vilikanê daranê fîkîyan, xweza ro vila bînê. Wextono ki mêrdim xwi nizdîkê daranê fîkîyan kerdênê, cîgera mêrdimî boya vilikan antênê. Mêrdim nêwaştênê ki daranê fîkîyan ra dûrî bikuwîyo. Yew di hewtan ra pey, darê fîkîyan vilikê xwi rişnaynê. Des pancês rojî rişnayîşê villikan ra pey, darê vamêrî firîngan gênê. Wextono ki firîngê daranê vamêran bînê gird, ki hêdîna werîyaynê, gedan dest bide kerdê vera xwi daynê hetê mîyanê rezan şînê firîngan. Gedanê dew ki şînê daranê vamêran het, ca di bi daran ro çikurîyaynê şînê daran ser, firîngî çînanyê, werdênê. Hetanî pîzê gedan nêdejaynê, yan zî didanê jînî werdişê firîngan ra har nêbînî, daran serra nîyameynê war. Ki gedan daranê vamêran sero mîrdî firîngî werdî, naro dest bide kerdênê cêbê xwi pirê firîngî kerdênê. Gedan firîngî girotê berdê keye daynê may ya zî wayan û birayandê xwi. Firîngê vamêran hetanê peynîya aşma nîsani zî werîyaynê. Peynîya aşma nîsani di firîngê daranê vamêran hêdîna bînê qert û nêwerîyaynê.

Wesaran hêgayanê beyaran û mergozan di çerenayîşê bizêkan, berxan û golikan

Gedanê dewijan, serêsibay rew bizêkî, berxî û golikî berdênê beyaran û mergozan di çerenaynê. Hila mîyanê rojî ki nizdî bînê, gedan semedê sêparî berxî, bizêkî û golikî kom kerdênê girotê berdê keye. Wexta ki gedan bizêkî, berxî û golikî berdênê keye yew rayan rayîd di berxî, bizêkî û golikî û colê terş û dewarî leqa yewbînan bînê. Yew het ra golikî mangey oraynê. Yew het ra berxî û bizêkî, bizî û mî maraynê. Marîya berxan, bizêkan, orîya golikan, mari mara mîyan, bizan û orîya mangan têqelibiyaynê. Bînê yew qelabalix û şemate. Heme hewa ra veng hameynê. Semedo ki bizêkî, golikî û berxî nêdekwiyê mîyanê colanê terş û dewarî gedey mîyanê yew kelecanêda gird di bî. Bînê qîji qîji û bari bara kulfetan.

Gedê ki bizêkan, berxan û golikan verdbî, werbi hila taştarî zaf bînê veyşan, gamê aver waştênê ki şorê keyan.

Wesaran xeybe kebanîyê dewi semedê werdişê sêparî nano patîle wo mîyanê jê torak û pîyaz dekerde hedirnaynê. Ya zî kebanîyan biney toraq dekerdê mîyanê namkîyan, toraqî sero yew qat riweno kele pehenkerde hedirnaynê. Gedey ki çerenayîşê bizêkan, berxan û golikan ra hameynê keye, ki werdiş gor zerda jîni nêbînê, mayanê xwi ser di bermaynê. Çend deqey bermeyîşê ra pey maya gedan ge ge gor waştena gedan werdiş hedirnaynê. Yew rayan kebanî yê keyan semedo ki zerra gedan weşbo, gedan rê hakî qelênaynê. Rojo ki maya gedan hakî biqelênaynê, aw roj kêfê gedan rê vatiş çinêbi. Kêf kêfê gedan bi. Gedan kêfan ra kerdênê ki bifirê. Gedan ki werdişê xwi werd, semedê kaykerdişî keyan ra vejîyanê, raşt vera xwi daynê mîyanê dewi. Gedey şînê orxman sero bindê seyanê dêsan û daranê tiwêran di kay kay kerdênê.

Colê terş û dewarî ki şiwanan sêparê ardênê keyan, davîst deqan re pey, kebanî yê dew dest bide kerdê bizêkî, berxî û golikî lawaynê. Lewnayîşê bizêkan, berxan û golikan ra pey, kebanîyan dest bide kerdênê lez û bez bizî, mî û mangey ditênê. Nabênê kebanîyan, mîyan, bizan û mangan di bînê yew şemate. Satil ya zî elbikî kebanîyan destbî, bi lez û bez destê xwi berdênê bi yew bizi ya zî mî tepiştênê antênê xwi ver. Kebanî bizi ya zî mî ya ki tebiştbî antbî xwi ver, ca di tuncikiya roniştênê destê xwi berdê bi gohanan çiz biz şit ditênê. Tay bizan û mîyan dejê gohananê xwi ra kerdê bari bari maraynê. Mîyanê hewşanê keyan di bînê şematê kebanîyan mîyan û bizan. Tay bizan û mîyan zî bindê seya perçînan û daranê tiwêran di mexelkerdebî, mişort kerdênê, betiliyayîşê yabanî xwi serra vistênê. Heyanî sêpare ra şîyayîşê terş û dewarî, gedan mîyanê dewi di bindê seyanê dêsan û daranê tiwêran di kaykerdişê xwi domnaynê. Xebata lewnayîş û ditişê şitî ki peynî bide hamey, taştare ra pey, şiwanan, gawanan terş û dewar mîyanê keyan ra vetê hewna girotê berdê yaban semedê çernayîşî. Ki terş û dewar mîyanê keyan ra vejîya, golikvanî û bizêkvanî zî bizêkî û golikî mîyanê keyena ra vetênê girotê berdê yaban, beyaran û mergozan di hetanî mexrebê çerenaynê.

Serê sibay rew, wexta ki gedey dewi şînî bizêkan, berxan û golikan ver, rew hewn ra wariştênê. Wexta ki gedey mergozan, hêgayanê beyaran di bizêkî, berxî û golikî çerenaynê, bêhewney zorê qorê gedan berdênê. Qorê gedey xelmaşê hewnî bînê dekewtênê hewin. Bizêkî, berxî û golikî şînê dekewtênê mîyanê zevîyandê dewijan. Yew midet ra pey gedo ki dekewtbi hewin, hewin ra ki xwi hesîyaynê, verê biney çimê xwi vilênaynê, hewin xwi serra vistênê, dim ra xwi dorme ra hewnîyaynê. Gedan ki dînê bizêkî berxî û golikî mergozan di çinî yê. Aw roj, gedey bê bizêkan, berxan û golikan şînê keyan. Bizêkî, berxî û golikê gedan bidewkewtê zevî yê kam dewijî, aw dewij, bizêkî, bexî û golikî girotê berdê kêdê xwi di dekerdê mîyanê axwirê keyî. Ya zî wexta ki gedan veynaynê wayîrê zevî hanîko bizêkî, berxî û golikî kerdê xwi vernî gêno beno, ca di vazdaynê şînê xwi wayîrdê zevî resnaynê. Gedey dormê wahîrê zevî di doç bînê, lebîyaynê, vera gêraynê, semedo ki bizêkan, berxan û golikanê xwi peydi bigîyê. Wayîrê zevî yew rayan bizêkî berxî û golikî pey di daynê gedan. Yew rayan zî gedan sekerdê nêkerdê, nêşênanynê bizêkan, berxan û golikanê xwi wahîrê zefî ra bigîyê. Bînê biri bira wayîrê zevî, xwi fek di qalî kerdênê û xwi gijê gedan kerdênê, bizêkî berxî û golikî pey di nêdaynê gedan. Ki gedey bê bizêkan, berxan û golikan bişînê keye, may û pî yê gedan hêrs bînê. Yew rayan mayan û pîyan daynê bi gedan ro. May ya zî pî yê gedan şînê kêdê wahîrê zevî, wahîrê zevî vera gêraynê, bide lebîyaynê. Yew verageyrayîşo derg ra pey, may, ya zî pî yê gedan berxî, bizêkî û golikî wayîrê zevî ra girotênê. Eno sebep ra yew rayan gedan kutişêdo weş may û pîyanê xwi ra werdênê. Devam Edecek…